رسالة لكل مستخدمي مواقع التواصل الاجتماعي .. #أنا_إنسان

عزيزي ساكن مواقع التواصل الأجتماعي .. أحب ألفت انتباهك انك إنسان حقيقي مش مجرد اكاونت افتراضي واني مش مجرد اسم وصورة مكتوب جنبها كلام وخلاص.

أحب أوضحلك أني براعي مشاعرك, ومش بوجهلك كلمة تضايقك, لاني عارف ان الاكاونت اللي باسمك مملوك لإنسان بيقرا وبيحس, وممكن الكلمة تهينه أو تفرحه.

أحب أؤكدلك, اني بقرأ اللي أنت بتكتبه وأني إنسان زيك, بتجرحه الإهانة وبينبسط بكلمات بسيطة بتكتبله زيالله يوفقك, أو ربنا معاك“.

أحب أنك تعاملني كأننا بنتكلم وجها لوجه, شوف لو بنتناقش وبنتكلم وجها لوجه هتكلمني إزاي, وهتكون حابب أكلمك بأي أسلوب.


أحب أنك تعرف أني معرفكش شخصيا أو افتراضيا, أكيد أنا مش بكرهك, وأكيد أنت مش بتكرهني.

بلاش تفرض على نفسك مشاعر قررت أنك توجهها لي, سواء بالحب أو بالكره, أسمع مني وسيب المشاعر تيجي لوحدها.

أحب أنك تشغل عقلك وتناقشنى واناقشك, مش أنك تشتم وتجري, أنت لو بتتكلم مع واحد صاحبك في الشغل هتشتمه وتجري؟

عاملني كأني شايفك, لاني فعلا شايفك وبكلمك وهفضل فاكرك بالخير أو بالشر, أنت اللي هتقرر هفتكرك بإيه من أسلوبك معايا.

أحب أنك تحترم رأيي زي ما أنا بحترم رأيك ..

ممكن تعاملني باحترام؟ لأني ولا أذيتك ولا في يوم هتسببلك في أذي, بس والله أنت لما بتشتمني أنا بتأذي نفسيا, لاني والله أنا بني أدم وبحس.
ومواقع التواصل الإجتماعي مش مكان لتفريغ كبتك على مخاليق ربنا. طريقة تعاملك مع ساكنيها بتوضح حقيقة شخصيتك وإن كنت محترم أو لأ.

عزيزي ساكن مواقع التواصل الأجتماعي, انت في مكان اتوجد للتواصل بين البشر, مش لفرض رأيك وافكارك عليهم, احترمهم الله يكرمك عشان هم مش عبيد عندك

 

Categories:   Uncategorized

Comments

Leave a Reply